Climate Week NYC-də dizel modelinin istehsalının bitdiyini elan edirik – son dizel avtomobilimiz 2024-cü ilin əvvəlində istehsal olunacaq

2030-cu ilə qədər biz yalnız tam elektriklə işləyən avtomobilləri satmağı planlaşdırırıq və 2040-cı ilə qədər hədəfimiz iqlim üçün neytral bir şirkət olmaqdır. Hərtərəfli elektrikləşdirmə istiqamətində həyata keçirilən bu aydın yol xəritəsi hər hansı bir köhnə avtomobil istehsalçısının ən iddialı keçid planlarından birini təmsil edir.

Bu ambisiyalara sadiqliyimizi vurğulamaq üçün bu gün Climate Week NYC-də biz dizel mühərriki ilə işləyən bütün Volvo Car modellərinin istehsalının 2024-cü ilin əvvəlinə qədər yekunlaşdırıldığını bəyan edirik. Bir neçə ay sonra dizellə işləyən sonuncu Volvo avtomobili hazırlanacaq və bu, Volvo Cars-ı bu addımı atan ilk köhnə avtomobil istehsalçılarından birinə çevirəcək.

Bu mərhələ keçən il yeni daxili yanma mühərriklərinin işlənib hazırlanmasından çıxmaq qərarımızdan sonra baş verir. 2022-ci ilin noyabrında biz qalan daxili yanma mühərriki resurslarımızı özündə birləşdirən birgə müəssisə olan Aurobay-dakı payımızı satdıq. Artıq yeni daxili yanma mühərriklərinin yaradılmasına T və İ büdcəmizin bir kronunu belə xərcləmirik.

"Elektriklə işləyən güc aqreqatları bizim gələcəyimizdir və daxili yanma mühərriklərini üstələyir: onlar daha az səs-küy, daha az vibrasiya, müştərilərimiz üçün daha az xidmət xərcləri yaradır və sıfır səsboğucu emissiyaya malikdir", deyə baş icraçı direktorumuz Jim Rowan deyir. "Biz bütün diqqətimizi müştərilərimizin Volvo-dan gözlədikləri hər şeyi təmin edən və iqlim dəyişikliyinə reaksiyamızın əsasını təşkil edən premium, tam elektriklə çalışan avtomobillərdən ibarət geniş portfel yaratmağa yönəldirik.”

Təcili tədbir görülməsinə ehtiyac var

Biz elektrikləşdirmə üçün əlimizdən gələni edirik və bunu düzgün addım hesab edirik. BMT-nin bu yaxınlarda dərc etdiyi Qlobal İqlim Dəyişmələri üzrə hesabatı bəşəriyyətin üzləşdiyi fövqəladə iqlim vəziyyətinin aktuallığını, habelə tədbir görülməsinə ehtiyac olduğunu vurğuladı.

"Planetimiz və bəşəriyyətin bu kritik dövründə dünyanın indi ehtiyac duyduğu şey liderlikdir", Jim Rowan deyir. “Sənaye və siyasi liderlərin güclü və qətiyyətli olmalarının, iqlim dəyişikliyi ilə mübarizə aparmaq üçün mənalı siyasət və tədbir görmələrinin vaxtı gəlib çatdı. Biz üzərimizə düşəni etməyə və analoji təşkilatları, eləcə də dünya üzrə siyasi liderləri öz üzərinə düşənləri etməyə təşviq etməyə sadiqik”.Bu məqamı daha geniş vurğulamaq üçün davamlı inkişaf üzrə baş mütəxəssisimiz Anders Kärrberg bu ilki Climate Week NYC-də Accelerating to Zero (A2Z) Koalisiyası tərəfindən təşkil edilən tədbirdə iştirak edəcək. COP27 iqlim sammitində yaradılan A2Z Koalisiyası bizim də iştirak edərək Sıfır Emissiyalı Nəqliyyat vasitələri haqqında Qlazqo Bəyannaməsi imza atdığımız tərəflər üçün çoxtərəfli platforma təqdim edir.

A2Z platforması bizə koalisiyanın 2040-cı ilə qədər (aparıcı bazarlarda isə 2035-ci ildən gec olmayaraq) qlobal yeni avtomobil və furqon satışlarının 100 faizini səsboğucu emissiyalarından azad etmək üzrə kollektiv hədəfə nail olmaq məqsədilə başqaları ilə əməkdaşlıq etməyə və görüləcək tədbirləri əlaqələndirməyə imkan verir.

Öz elektrikləşdirmə hədəfimiz bundan daha iddialı olsa da, biz ümid edirik ki, dizel mühərrikləri ilə bağlı bugünkü elanımızla və Climate Week NYC-də A2Z müzakirələrində və digər toplantılarda iştirak etməklə digər şirkətləri iqlim dəyişikliyinə qarşı daha cəsarətli addımlar atmağa ruhlandıracağıq.

Dəyişən dünyagörüşü

2024-cü ilin əvvəlinə qədər dizel yanacağından tamamilə imtina etmək qərarımız iqlim böhranında avtomobil sənayesinin və istehlakçı tələbinin nə dərəcədə sürətlə dəyişdiyini göstərir.

Cəmi dörd il əvvəl, digər avtomobil istehsalçılarının əksəriyyətində olduğu kimi, dizel mühərriki Avropada bizim yağ-çörəyimiz idi. 2019-cu ildə qitədə satdığımız avtomobillərin əksəriyyəti dizel mühərriki ilə təchiz edilmişdi, elektrikləşdirilmiş modellər isə yenicə öz izlərini qoymağa başlamışdı.

Bu tendensiya o vaxtdan bəri dəyişən bazar tələbi, daha sərt emissiya qaydaları və eləcə də elektrikləşdirməyə yönləndirdiyimiz diqqətimizdən asılı olaraq xeyli dəyişdi. Avropada satışlarımızın əksəriyyəti hazırda ya tam elektrikli, ya da qoşulan hibrid güc aqreqatı olan elektrikləşdirilmiş avtomobillərdən ibarətdir.

Küçələrdə dizellə işləyən avtomobillərin azalması da şəhər havasının keyfiyyətinə müsbət təsir göstərir; dizel yanacağı benzin mühərrikləri ilə müqayisədə daha az karbon qazı buraxsa da, xüsusilə yaşayış məntəqələrində havanın keyfiyyətinə mənfi təsir göstərən azot oksidi (NOx) kimi daha çox qaz buraxır.

Əhəmiyyətli investisiyalar

Hədəfimiz onilliyin ortalarına qədər 50 faiz tam elektriklə işləyən avtomobilləri və 2030-cu ilə qədər yalnız tam elektrikli modelləri satmaqdır.

Lakin elektrikləşmə tam kifayət deyil. Məsələn, hətta tam elektriklə işləyən Volvo C40 iqlimə neytral təsir edən enerji ilə doldurulduqda istismar müddəti ilə bağlı qiymətləndirməmiz onun istismar müddəti boyunca hələ də 27 tonluq karbon emissiyalarına cavabdeh olacağını göstərir. Bu o deməkdir ki, material istehsalı və emalı yolu ilə emissiyaların azaldılması qısamüddətli hədəflərimizə və iqlimlə bağlı uzunmüddətli məqsədlərimizə çatmaq üçün açardır.

Polad, alüminium və akkumulyatorlardan emissiyaları azaltmaq üçün biz təchizatçılarımızın qarşısına daha sərt tələblər qoymaq, bu materialların istehsalının yeni və daha yaxşı yollarını tapmaq və təkrar emal olunmuş kontentin payını artırmaq istiqamətində fəal şəkildə çalışırıq.

Bu hədəflər və fəaliyyətlər yeni texnologiyalara və istehsal imkanlarına əhəmiyyətli investisiyaların qoyulması ilə dəstəklənir. Avropa, Çin və ABŞ-dakı əməliyyatlarımıza investisiyalar qoymaqla biz aktiv şəkildə istehsal şəbəkəmizi tam elektriklə işləyən gələcəyə hazırlayırıq, eyni zamanda qlobal əməliyyatlarımızda iqlimə neytral təsir göstərən enerjinin istifadəsini bu gündən təxminən 66 faizdən artırırıq.

Slovakiyada biz yalnız təmiz elektriklə işləyən avtomobilləri istehsal edəcək yeni avtomobil zavodu inşa etməyi planlaşdırırıq, eyni zamanda tam elektriklə işləyən avtomobillərin istehsalına şərait yaratmaq üçün mövcud zavodlarımıza əhəmiyyətli investisiyalar qoymuşuq. İsveçdə, habelə İsveçin aparıcı akkumulyator firması Northvolt ilə birlikdə iqlimə tamamilə neytral təsir göstərən enerji ilə işləyən tam yeni akkumulyator zavodu inşa edəcəyik.