Volvo 960 Sedan Bensín • Dísilolía

Haustið 1990 var Volvo 960 afhjúpaður sem árgerð 1991. Nýr Volvo 960 kom í stað Volvo 760, sem verið hafði í framleiðslu frá árinu 1982.

Volvo 960 var knúinn með glænýrri sex strokka, 3,0 lítra vél. Hér var um að ræða háþróaða afleiningu með strokkstykki úr áli og tveimur yfirliggjandi kambásum fyrir fjóra ventla á hverjum strokki. Þessi vél var fyrsta stigið í glænýrri kynslóð véla, sem að lokum skilaði sér í nýrri línu fimm og fjögurra strokka Volvo-véla.

Ýmis nýr öryggisbúnaður fylgdi Volvo 960, þar á meðal þriggja punkta öryggisbelti með tregðuspólu og stillanlegur höfuðpúði fyrir miðju aftursæta. Einnig var hægt að fá bílinn afhentan með innbyggðum barnabílstól í armpúða fyrir miðju aftursætanna.

Þessi búnaður, ásamt öðrum öryggisbúnaði, aflaði bílnum fjölda viðurkenninga, og þá ekki síst verðlaunin „Prince Michael Road Safety Award“ og „Autocar & Motor“ fyrir besta öryggisbúnaðinn.

Hönnun Volvo 960 tók miklum breytingum með árgerð 1995. Framhlutinn fékk nýtt útlit; undirvagninn var tekinn í gagngera yfirhalningu, þar á meðal var fjölarma fjöðrun að aftan þróuð enn frekar með þverlægum blaðfjöðrum úr samsettu efni. Ný 2,5 lítra útfærsla sex strokka vélarinnar var nú í boði samhliða eldri 3 lítra útfærslunni.

Árið 1997 leysti Volvo S90 960 Sedan af hólmi.

Tæknilýsing
Gerð: 960 Sedan
Framleiðsla: 1990–1997
Fjöldi framleiddra bíla: 112.710
Yfirbygging: fjögurra dyra sedan
Vél: sex strokkar í línu með tveimur yfirliggjandi kambásum; 2473 cc eða 2922 cc
Gírskipting: fimm gíra beinskipting eða fjögurra gíra sjálfskipting
Hemlar: vökvaknúnir, diskahemlar á öllum hjólum
Mál: heildarlengd 487 cm, hjólhaf 277 cm